– Mijjieh dejtie ekonomeles haestiemidie damtebe mejgujmie gellie fuelhkieh tjabreminie Finnmarhkesne jïh Noerhte-Romsesne, guktie dan åvteste öörnege namhtah maanagïertesijjine gaajhkide maanide, hijven faalenassine sjædta. Daate sæjhta fuelhkieekonomijem tjirkedh jïh nænnoestidh gellide fuelhkide smaave maanajgujmie, sæjhta veanhtadihksvoetem sjugniedidh jïh aaj juhtemehaestemh gellijste saemien tjïeltijste jarkelidh, Mikkelsen jeahta.

Saemiedigkien statistihken mietie dellie 893 maanah abpe laantesne mah saemien maanagïertefaalenassem utnieh, jïh dejstie 665 maanah mah saemien maanagïertefaalenassem Finnmarhkesne jïh Noerhte-Romsesne utnieh.

– Sïjhtem Dajvedemografijemoenehtsem garmerdidh mij namhtah maanagïertesijjieh raeriesti goh reaktoe jïh vihkeles råajvarimmie mij maahta jienebh noerh skreejrehtidh dajvetjïeltide juhtedh. Ryöknemestuhtje vuesehte saemien fuelhkieh Finnmarhkesne jïh Noerhte-Romsesne mahte 22 millijovnh kråvnah maanagïertemaaksojne maeksieh fïerhten jaepien, jïh daelie dah daam reeknegem slyöhpoeh, jïh daan öörnegen åvteste Saemiedigkie lea barkeme gellie jaepieh, Mikkelsen jeahta.

– Tjuara öörnegem vijriedidh jeatjah saemien dajvide

Saemiedigkieraerie Mikkelsen veanhta namhtah maanagïertesijjieh aaj tjuara væjranidh jeatjah saemien dajvide, goh Romsa, Nordlaante, Trööndelage, Oslo/Viken jïh Innlandet. Saemiedigkien bijjieguvvie vuesehte 228 maanah saemien maanagïertefaalenassem åadtjoeh 24 maanagïertine – Romsan luvhtie noerhtene Oslon gåajkoe åarjene.

– Jis gaajhkh saemien maanah namhtah maanagïertesijjiem åadtjoeh, dellie daan öörnegen åasa sæjhta årrodh 7,5 millijovnh kråvnah Noerhte-Romsan åerjielisnie. Mijjieh Saemiedigkesne ektie seabradahkelutnjemem saemien fuelhkide vaajtelibie. Dïhte hijven dajvepolitihke jïh joekoen hijven gïelepolitihke, Mikkelsen minngemes jeahta.

Jis gihtjehtimmie jallh gyhtjelasse, gaskesadth saemiedigkieraeriem Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no