UNESCOn mietie daan biejjien gååvnesieh gaskem 6000 jïh 7000 gïelh veartanisnie, 96 proseenth gïelijste ajve golme proseenth soptsestieh. Jïjnjh gïelh jaemieh juktie eah naan dejtie soptsesth, jïh dïhte globaale digitaliseereme aaj negatijve effektem åtna dejtie veartenen aalkoealmetjegïelide.
Dovne Saemiedigkie jïh Tjïelte- jïh dajvedepartemeente ïedtjeles meatan barkosne luhkiejaepine.
– Mijjieh vaajtelibie dam luhkiejaepiem utnedh goh nuepie dovne nasjonaale jïh internasjonaale aalkoealmetjegïeligujmie barkedh. Gaskem jeatjah sïjhtebe nuepine barkedh saemiengïelide mobijletelefovnine utnedh jïh aaj ovmessie digitaale sijjine, Sigbjørn Gjelsvik (Gp) jeahta.
– Saemieh gamte laavenjostemem utnieh laanteraasti rastah jïh mijjieh fïerhten biejjien ovmessie daltesinie barkebe saemien gïelide nænnoestidh. Mov ulmie lea nasjonaale saemien gïelelutnjemem tseegkedh vuerkiehtamme prioriteeremigujmie, jïh mijjien veeljemh positijve synergijh utnieh aaj jeatjah aalkoealmetjegïelide, saemiedigkieraerie Mikkel Eskil Mikkelsen (NSR) jeahta.
Saemiedigkie jïh departemeente lea ektesne nasjonaale laavenjostemeforumem tseegkeme mij galka barkoem iktedidh luhkiejaepine Nöörjesne. Meatan leah gaskem jeatjah saemien noereorganisasjovne Noereh, Saemien jolleskuvle, Noerhte universiteete jïh Universiteete Romssesne – Nöörjen arktihken universiteete, Maahtoedepartemeente, Saemieraerie jïh Gïeleraerie.
Laavenjostemeforume lea nasjonaale luhkiejaepien dahkoesoejkesjem dorjeme. Dïhte nasjonaale dahkoesoejkesje galka mierievierhke barkose årrodh dan gïeleluhkiejaepien mietie, man ulmie saemien gïelide Nöörjesne gorredidh, vuaptastehtedh jïh evtiedidh.
Dahkoesoejkesjen åejvieulmieh leah tjïrkes abpe barkoen åvteste luhkiejaepesne. Institusjovnh jïh organisasjovnh mah leah nasjonaale laavenjostemeforumen meatan gelkieh dam nasjonaale dahkoesoejkesjem fulkedh jïh barkedh guktie dahkoesoejkesjen ulmide jaksedh.