2020 raejeste Saemiedigkie dïedtem åtneme saemien vïnhtsevaarjelimmien åvteste. Doh ræhpas vïnhtsh mah leah naevliejgujmie bigkesovveme leah åejviebielie saemien vïnhtsevaarjelimmesne, men bijjieguvviem fååtesibie magkerh vïnhtsi bijjeli mah annje gååvnesieh, man jeenjh mah gååvnesieh jïh gusnie leah. Jis edtja maam akt reeredh tjuara voestegh bijjieguvviem skååffedh dan bijjelen maam edtja reeredh. Dagkeres bijjieguvviem Saemiedigkie ij nuepiem utnieh jïjtje reebledh. Dan åvteste viehkiem daarpesjibie maehteles byjresijstie dagkeres bijjieguvviem darjodh sijjen geograafeles dajvine, jallh sjïere vïnhtsesåarhten bijjelen. Tjirrehtimmiemierie lea golme jaepieh dehtie raejeste luhpie dåarjoen bïjre vadtasåvva.

Vïnhtsh maaje naevstine, bïjlegåetine jallh fievsine gååvnesieh, naakenh aaj ålkone, dagke naakenh aaj vïedteldahkesne. Dej gaskem nordlaantenvinhtsh, mïelkesevïnhtsh, jeanoevïnhtsh, sjeektah, nuehtievinhtsh jïh jeatjah vïnhtsh. Ij gåaredh gaajhkh gorredidh, men tjoerebe sjiehteles låhkoem dejstie gorredidh båetijen aajkan. vïnhtsh leah daajroebaanghkh saemien vïnhtsebigkemevuekiej bïjre jïh vihkeles bielie saemien kultuvreste.

Mïnnh sæjrose Dåarjoe saemien kultuvremojhtesevaarjelæmman