Lohkh reektehtsem: Dååjrehts learoesoejkesjevierhkine LK20 Saemien. Gyhtjeles-goerehtimmie lohkehtæjjide.
Reektehtse lea dorjesovveme guktie orrestehteme jïh dotkemebaseereme maahtoevåaromem saemien ööhpehtimmien bïjre Maahtoedepartementese, Saemiedægkan jïh Ööhpehtimmiedirektoraatese vedtedh. Dan barkoen våarome lea ij dan jeenjh maahtoeh gååvnesieh dan bïjre guktie LK20 Saemien barkosne jåhta jïh guktie lohkehtæjjah learoesoejkesjevierhkiem dååjrehtieh jïh dam utnieh gåessie saemienfaagesne jïh faagine saemiengïelesne ööhpehtieh.
Goerehtimmien ulmie lij goerehtidh guktie lohkehtæjjah sjïehtesjimmien LK20S:ste dååjrehtamme, jïh aaj daejtie tsiehkide goerehtidh goh ööhpehtimmien öörneme, jaksoesvoete learoevierhtijste, vierhtiedimmiebarkoe, maahtoeevtiedimmie jïh maajeööhpehtimmie. Reektehtse aaj ööhpehtimmien sentraale mierie-eaktojde vuesehte jïh guktie lohkehtæjjah learohki gïeleåtnoem jïh eevtjemem vierhtiedieh.
Maahtoevåarome båata gyhtjeles-goerehtimmeste maam Ideas2Evidence lea tjïrrehtamme lohkehtæjjaj gaskem mah saemienfaagem jallh faagh saemiengïelesne ööhpehtieh. Reektehtsen gaavnoeh leah dej lohkehtæjjaj dååjrehtsh jïh vierhtiedimmieh gïeh lin meatan goerehtimmesne, eah dah gaavnoeh maehtieh abpe ulmiedåehkiem feerhmedh.
Vihkielommes gaavnoeh
- Lohkehtæjjah joekehtslaakan LK20S:m vierhtiedieh, jïh jeenjh dååjrehtieh ij leah aajkoe faageorrestimmine ennje eevre saetniedehteme.
- Jaksoesvoete learoevierhtijste lea gaertjie, jïh jeenjh lohkehtæjjah dååjrehtieh orrestehteme jïh sjiehteles learoevierhtieh fååtesieh jïh dïhte ööhpehtimmiem baajnehte.
- Maajeööhpehtimmie lea vihkeles biehkie ööhpehtimmiefaalenasseste, men haestemsh buakta öörnemen, sjïehteladtemen jïh tjïrrehtimmien åvteste.
- Jeenjh learohkh eah saemien gïelesijjieh jaksh skuvlen ålkolen, jïh lohkehtæjjah dååjrehtieh lea geerve learohki gïelem evtiedidh dan gaavhtan.
LK20 Saemien ennje sjïehtesjeminie
Jeenjh lohkehtæjjah dååjrehtieh ij leah aajkoe faageorrestimmine ennje eevre saetniedehteme. Dååjrehtsh LK20 Saemien sjïehtesjimmien åvteste joekehtedtieh, jïh lohkehtæjjah joekehtslaakan learoesoejkesjidie vierhtiedieh. Naan dejtie dååjrehtieh goh tjïelkes jïh nuhteligs ööhpehtimmesne, jeatjah utnieh dah leah ååpsen ræhpas, ij leah nuekies vihties jïh geerve dejtie barkosne nuhtjedh. Lohkehtæjjah julev- jïh åarjelsaemien jïh lohkehtæjjah reeremedajven ålkolen leah jeenjemasth laejhtehks learoesoejkesjevierhkien sjïehtesjimmien åvteste.
Vaenie learoevierhtieh gååvnesieh jïh dïhte ööhpehtimmiem baajnehte
Jeenjemes lohkehtæjjijste dååjrehtieh jaksoesvoete learoevierhtijste mah ööhpehtimmiem viehkiehtieh jïh leah learoesoejkesjevierhkien mietie, leah gaertjie. Daate dovne diedteme jïh digitaale learoevierhtieh feerhmie, jïh joekoen geerve saemienfaagine julev- jïh åarjelsaemiengïelesne. Jeenjh lohkehtæjjah jiehtieh dah tjuerieh ööhpehtimmievierhtieh evtiedidh jallh jarkoestidh, jïh jeenjh utnieh ööhpehtimmien kvaliteete nåakebe sjædta dan gaavhtan.
Maajeööhpehtimmie vihkeles, men barkoes
Lohkehtæjjah buerkeste ööhpehtimmie saemienfaagesne jïh faagine saemiengïelesne lea joekehtslaakan öörnesuvvieh, men maajeööhpehtimmie lea vihkeles biehkie ööhpehtimmiefaalenasseste, joekoen learoehkidie reeremedajven ålkolen. Lohkehtæjjah aaj haestiemidie buerkiestieh learohkedåehkiej öörnemen, vïesehtimmien jïh voenges sjïehteladtemen åvteste. Jeenjh lohkehtæjjah daerpiesvoeth buektieh learoesoejkesji åvteste mah lea stuerebe tsiehkesne maajeööhpehtæmman sjïehtelovveme.
Vaenie saemien gïelesijjieh lea haesteme gïeleööhpehtæmman
Jeenjh lohkehtæjjah learoehkidie ööhpehtieh mah vaenie jallh eah naan saemiengïelem dååjrehtieh skuvlen ålkolen. Joekoen reeremedajven ålkolen, julev- jïh åarjelsaemiendajvine jïh maajeööhpehtimmesne. Lohkehtæjjah dååjrehtieh jeenjh learohkh sijhtieh saemien lïeredh. Seammasïenten dah vuaptastehtieh ihke leah vaenie gïelesijjieh, vaenieh ööhpehtimmietæjmoeh jïh faatoes saemiengïeleldh vierhtieh, jïh dan gaertjiedimmien gavhtan lea geerve learohki gïelemaahtoem nænnoestidh.