Sametingspresident Silje Karine Muotka Ørjan Marakatt Bertelsen

–  Mijjieh garmeresvoetine mijjen orre saemiedigkieraerielïhtsegem åehpiedehtebe! Ole-Henriken lea dååjrehtimmie jieniebinie suerkine kultuvren sisnjelen mah sijhtieh sjyöhtehke årrodh gaskem jeatjah altese dïedtesuerkiej åvteste. Mijjieh aavoedibie laavenjostedh saemien kultuvrem jïh seabradahkem nænnoestidh, saemiedigkiepresidente Silje Karine Muotka (NSR) jeahta.

Orre saemiedigkieraerielïhtsege Ole-Henrik Bjørkmo Lifjell barkoem jåarhka Maja Kristine Jåman minngesne, gie daelie nåajsan jïh permisjovnem vaalta boelhken minngiegietjien raajan. Ole-Henrik Bjørkmo Lifjell lea 31 jaepien båeries jïh Bleikvasslieste Nordlaanteste båata. Jaepien 2021 Lifjell saemiedigkietjirkijinie veeljesovvi Nöörjen Saemiej Rïjhkesiebriej (NSR) åvteste Åarjelsaemien veeljemegievlesne. Dïhte lïhtsege Jieleme- jïh kultuvremoenehtsisnie, jïh dan lea dååjrehtimmie jieniebistie suerkijste kultuvren sisnjelen.

Ole-Henrik Bjørkmo Lifjell (NSR) dïedtem åådtje daej politihkeles dïedtesuerkiej åvteste saemiedigkieraeresne:

•           Kultuvre

•           Klijma, byjrese jïh energije

•           Areaale jïh fealadasse

•           Medijah

Ole-Henrik Bjørkmo Lifjell (NSR) Inger Elin Utsi (Sámediggi)

Ole-Henrik barkoem aalka voerhtjen, dæjstan 29.b., jïh lea riejries barkoem jåerhkedh aarebi saemiedigkieraerien minngesne.

– Manne aavodem dam hijven barkoem jåerhkedh maam saemiedigkieraerie jïh aarebi raerielïhtsege leah tjïrrehtamme. Daate krïevije, gieltegs jïh dynamihkeles aarkebiejjine sjædta mïsse damtem mov lea stoerre skraejrie jïh mïsse leam riejries, Ole-Henrik Bjørkmo Lifjell (NSR) jeahta.

Ole-Henrik Bjørkmo Lifjellen lea permisjovne snjaltjen 15.b raejeste mïetsken 2.b. 2025 raajan. Daate aarebi latjkoej gaavhtan mah leah dorjesovveme åvtelen jååhkesji raerielïhtseginie sjïdtedh.