Mikkel Eskil Mikkelsen Vaino Rensberg/Sametinget

– Manne Rossen tjïeltem læhkohtem jïh goevtesem buerie båeteme vaajtelem, jïh maanagïertem öörnegen sïjse namhtah saemiengïeleldh maanagïertine bööredem, saemiedigkieraerie Mikkel Eskil Mikkelsen (NSR) jeahta.

Goevtese Praahkesne faalenassem nænnoste

Aarebistie 3 saemien maanagïertefaalenassh åarjelsaemien gïeledajvesne daanbien. Daelie læssene 4 maanagïertefaalenasside dan gaavhtan Praahka lea saemien goevtesem åådtjeme. Rossen tjïelte lea mieriedimmide jarkelamme. Mikkelsen jeahta vihkele jienebh maanagïertefaalenassh åadtjodh.

– Akte eevre tjïelke ulmie Saemiedægkan lea saemien maanagïertefaalenassem lissiehtidh, jïh dan åvteste tjïelteståvroen nænnoestimmie sjollehke jïh vihkele. Manne Rossen tjïelten læhkohtem dannasinie daate guhkiebasse sæjhta låhkoem saemiengïeleldh maanijste lissiehtidh jïh meatan årrodh hoksedh saemien maanah reaktam åadtjoeh saemien kultuvrine jïh seabradahkejieliedinie byjjenidh, Mikkelsen jeahta.

Öörnegen sïjse namhtah saemiengïeleldh maanagïertine böörede

Jarkelimmine nænnoestimmeste goevtese nuepiem åådtje meatan årrodh Saemiedigkien öörnegisnie namhtah saemiengïeleldh maanagïertine. Öörnegen ulmie lea maanagïerte edtja ellies saemiengïeleldh sjïdtedh, seamma tïjjen goh eejhtegh slyöhpoeh eejhtegemaaksoem jïjtjh maeksedh. Daate edtja dorjesovvedh refusjovneöörnegen tjïrrh jïh laavenjostoelatjkoen tjïrrh maanagïerteaajhterigujmie.

Mikkelsen maanagïertem buerie båeteme öörnegen sïjse vaajtele jïh haasta seamma tïjjen maanagïertem dåarjoem ohtsedh goh saemien goevtese:

– Mijjieh libie öörnegem nïerhkeme namhtah saemiengïeleldh maanagïertine mij daelie aaj maahta goevtesem Praahkesne feerhmedh. Daate lea öörnege mestie gegkestem goevtesem goh akte bielie vuejnedh, jïh gegkestem mijjieh lyhkesibie laavenjostoelatjkoem sjïehtesjidh gusnie mijjieh dejtie daerpies sïllide hammoedibie mah edtjieh hoksedh goevtese ellies saemiengïeleldh sjædta, Mikkelsen minngemes jeahta.