Råajvarimmien åasa sæjhta 3 millijovnh kråvnah årrodh jïh sæjhta faamosne årrodh mïetsken 1.b. 2023 raejeste.
– Mijjieh jienebh saemien gïeleutnijh daarpesjibie, jïh maanagïerte lea mijjen stööremes jïh dagke vihkielommes dåårrehtimmieareena. Dan åvteste saemiedigkieraerie raereste eejhtegemaaksoem maeksedh saemiengïeleldh maanagïertine goh dåårrehtimmieråajvarimmie, jïh mij lissine sæjhta dajvepolitihkeles bieliem utnedh dan åvteste doh jeenjemes saemien maanagïerth leah dajvine staari ålkoli, saemiedigkieraerie Mikkel Eskil Mikkelsen jeahta.
Mikkelsen raeriestimmiem åtna goh vihkeles saemien gïeleråajvarimmie jïh gegkeste daate sæjhta dåårrehtimmiem daejtie maanagïertide lissiehtidh.
Lissiehtasse reerenassen raeriestæmman
Reerenasse sov staatebudsjedtesne 2023 raereste namhtah maanagïerteöörnegem Finnmarhkesne jïh Noerhte-Romsesne sjïehtesjidh. Saemiedigkieraerie daam bæjjese fulkie jïh öörnegem vijrede guktie aaj lea faamosne saemiengïeleldh maanagïertide jïh goevtesidie reerenassen råajvarimmiedajven ålkolen.
– Saemiedigkie lea gellien aejkien daerpiesvoetem lutnjeme saemien maanaj reaktam saemiengïeleldh maanagïertesæjjan laakine vihtiestidh. Daate råajvarimmie lea voestes sïlle Saemiedigkien barkosne laakejarkelimmien åvteste barkedh, Mikkelsen jeahta.
Gïelelutnjeme mij sæjhta saemien seabradahkem nænnoestidh
Sæjhta sjïehtesjimmiem namhtah saemiengïeleldh maanagïerteöörnegistie bæjjese fulkedh maahtoelutnjemeråajvarimmiejgujmie goh dåarjoe gïeleevtiedæmman maanagïertide.
– Daate lea budsjedteraeriestimmie saemiedigkieraereste jïh mijjieh sijhtebe maanagïerth edtjieh dåarjoem åadtjodh gïelebarkoem maanagïertine evtiedidh, jïh dejtie nuepiem vedtedh barkojne nænnoes gïelemaalli mietie nierhkedh. Seamma tïjjen sïjhtebe maanagïerti aajhterigujmie rååresjidh guktie råajvarimmieh dej voenges daerpiesvoeti mietie gaavnebe man åvteste daate gïelelutnjeminie sjædta maam saemien seabradahke tjarke daarpesje, Mikkelsen jeahta.
Saemiedigkieraerie sæjhta ellies raeriestimmiem budsjedtese buektedh båetijen duarstan golken 27.b. ts. 08.00.
Jis gihtjehtimmie jallh gyhtjelassh, gaskesadth saemiedigkieraeriem Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no jallh politihkeles raeriestæjja Anne Toril Eriksen Balto (Gk) tlf: +47 413 10 027 anne.toril.eriksen.balto@samediggi.no