Gïelevåhkoen sjïekenisnie Saemiedigkie earoehtimmiem vadta akten almetjasse, dåahkan jallh organisasjovnese mij saemien gïelem hijvenlaakan nuhtjeme jïh våajnoes dorjeme sov biejjieladtje barkosne. Gïelelutnjemevitnije 30 000 kråvnah jïh tjeahpoediplomem åådtje. Marte Somby lea tjeahpoediplomem dorjeme.
Saemiedigkieraerie lea moeneme gïelelutnjemebaalhkam 2022 vedtedh Lemet-Jon Aagese, Aage Agnar Solbakk.
– Sïjhtem barkoen åvtese gijhtedh maam Lemet Jon Aage lea dorjeme gïelem jïh aerpievuekien daajroem jieledevuekien bïjre åehpiedehtedh jeanoesaemiej gaskem Deatnuvuemesne, jïh manne gïelelutnjemebaalhkine læhkohtem, saemiedigkiepresideente Silje Karine Muotka (NSR) jeahta.
Historiker Aage Solbakk.
Sametinget/Vaino Rensberg
Aage lea saemien gïeline barkeme gellie jaepieh jïh dovne aerpievuekien daajroem åehpiedahteme jïh faagegærjah bæjhkoehtamme. Dïhte veeljeme tïjjem nuhtjedh daajroem saemien seabradahkine juekedh saemiengïelesne. Saemiedigkien daajroen mietie dïhte meatan orreme ovrehte 200 gærjah jïh tjaalegh bæjhkoehtidh, jeenjemasth noerhtesaemien gïelesne. Aage lea historihkere jïh lea vuesiehtimmien gaavhtan saemien tjaelemegïelen histovrijen bïjre tjaaleme. Dïhte aaj jïjnjh gïelefaageles barkoeh dorjeme, vuesiehtimmien gaavhtan sijjienommh sïjse tjöönghkeme, jïh gïeleræjhkoesvoetem saemien aerpievuekien jielemi sisnjeli dokumenteereme jïh åehpiedahteme.
Aage reakadamme 1943 Båtengesne. Dïhte byjjenamme jïh abpe jieledem vyöseme Deatnun gaedtiebealesne, jïh lea aerpievuekien daajroem dovne loesereeremen jïh loesegöölemen bïjre lïereme maanabaelien raejeste.
– Sov barkojne dïhte lea vuesiehtamme man stoerre ræjhkoesvoete jïh daajroe loesen bïjre mij aerpievuekien loesegöölemisnie jïh loesereeremisnie gååvnese. Dïhte gïeleræjhkoesvoetem tjöönghkeme, dokumenteereme jïh åehpiedahteme mij loesegöölemen sisnjelen gååvnese, loesen bïjre, göölemesijjiej, sijjienommi jïh aerpievuekien loesereeremen bïjre, Muotka jeahta.
Joekedimmie Saemiedigkien gïelelutnjemebaalhkeste lea Snåasesne aejlegen golken 23.b. Dellie rïhpestimmie gïelevåhkoste jïh aalkoeåålmegegïeli juhkiejaepeste (IDIL). Saemiedigkiepresideente Silje Karine Muotka jïh raerielïhtsegh Mikkel Eskil Mikkelsen jïh Maja Kristine Jåma leah stïeresne rïhpestimmesne.
Lohkh vielie rïhpestimmieöörnemen bïjre: https://sametinget.no/Kalender/CalendarEvent.aspx?Id=633&MId1=7