Goh bielie saemiedigkieraerien raeriestimmeste Saemien jïlleskuvle definisjovnem aalkoeåålmegeinstitusjovne åådtje. Saemien jïlleskuvle raastenrastah barkeminie jïh goerkesem våaroeminie åtna saemieh leah akte aalkoeåålmege. Saemiedigkieraerie lea aarebi dåarjoem åådtjeme saemien gïelh aalkoeåålmegegieline vihtiestidh dennie orre gïelelaakesne maam Stoerredigkie gïetedeminie.
Saemiedigkieraerie Mikkel Eskil Mikkelsen (NSR)
Sámediggi
– Saemiedigkieraaran lea vihkeles hoksedh Saemien jïlleskuvle nuepiem åådtje jïjtjemse saemien institusjovnine evtiedidh. Dan åvteste raeriestibie Saemien jïlleskuvlen raastenrastah gïehtelimmiedajve jïh jïlleskuvlen våarome ööhpehtæmman jïh dotkemasse vååjnesasse båetieh laakine. Mijjieh daejrebe Saemien jïlleskuvlen leah syjhtedassh aalkoeåålmegeuniversiteetine sjïdtedh. Laakine vihtiestidh Saemien jïlleskuvle lea aalkoeåålmegeinstitusjovne lea akte sïlle dan otnjegen vööste, saemiedigkieraerie Mikkel Eskil Mikkelsen (NSR) jeahta.
Sæjhta dïedtem laakine vihtiestidh
Saemiedigkieraerie aaj raereste Saemien jïlleskuvle edtja sov dïedtem vihtiestidh juktie gaajhkh saemien gïelh faagegieline evtiedidh.
– Saemiedigkieraerie raereste rååresjimmesne Saemien jïlleskuvline dej dïedtem vihtiestidh juktie gaajhkh saemien gïelh faagegieline evtiedidh. Tjuara dam tjoevkesisnie vuejnedh Saemien jïlleskuvlen barkoste laanterastaj rastah. Manne aavone Saemien jïlleskuvle lea dan tjyölkehke dan bïjre jïh mijjieh Saemiedigkeste sïjhtebe daam aamhtesem bæjjese fulkedh gosse edtja universiteete- jïh jïlleskuvlesuerkien mierieh gïehtjedidh aktene minngebe stoerredigkiebïevnesisnie.
Sæjhta råållam vijriedidh
Daelie Saemiedigkie göökte ståvroelïhtsegh Saemien jïlleskuvlese nammohte, men sæjhta råållam vijriedidh universiteete- jïh jïlleskuvlesuerkesne jïh aaj ståvroeåvtehkem Saemien jïlleskuvlese jïh ståvroelïhtsegh Noerhte universiteetese jïh UiT - Nöörjen arktiske universiteetese nammoehtidh.
– Saemiedægkan vihkele aktem tjïelke råållam utnedh stuvremisnie universiteete- jïh jïlleskuvlesuerkeste. Akte vierhkievierhtie daennie ektiedimmesne lea eadtjohkelaakan meatan årrodh ståvrojde nammoehtidh dejnie ovmessie ööhpehtimmieinstitusjovnine. Doh noerhtemes institusjovnh aktem joekoen vihkeles dïedtem jïh råållam utnieh saemien siebriedahkesne jïh daate aaj tjuara vååjnesasse båetedh ståvroelïhtsegi gaskem. Ståvroeh dagkeres maahtoem daarpesjieh, Mikkelsen jeahta.
Moenehtse Saemiedigkiem tjelmiehti
Raeriestimmesne orre universiteete- jïh jïlleskuvlelaakese raereste Saemiedigkien råållam gaertjiedidh jïh Saemiedigkie edtja nammoehtimmiereaktam byjngetje ståvroelïhtsegijstie Saemien jïlleskuvlese dassedh.
Mikkelsen daam raeriestimmiem tjarke laajhta, ij goh unnemes dan åvteste moenehtse ij leah Saemiedigkiem råållam stuvremisnie universiteete- jïh jïlleskuvlesuerkeste vuarjasjamme.
– Saemiedigkieraerie ij guktie gænnah maehtieh jååhkesjidh Saemiedigkien faamoe jïh råålla viesjiehtåbpoe sjidtieh, jïh manne vuajnam moenehtse ij leah nuekie hijvenlaakan guarkeme maam Saemiedigkie jallh Saemien jïlleskuvle leah. Ij leah hijven gosse raeriestieh Saemiedigkien nammoehtimmiereaktam gaertjiedidh. Saemiedigkieraerien bieleste veeljebe dan åvteste tjyölkehke årrodh mijjen raeriestimmine mijjen veanhtadimmiej bïjre gosse lea Saemiedigkien råållan jïh faamoen bïjre stuvremisnie universiteete- jïh jïlleskuvlesuerkeste laaken tjïrrh, jïh guhkiebasse barkosne stoerredigkiebïevnesinie stuvremen bïjre universiteete- jïh jïlleskuvlesuerkeste.
Jis gihtjehtimmie jallh gyhtjelassh, gaskesadth saemiedigkieraeriem Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no