Ryöjredimmieh orre saemiedigkieboelhkese

Ryöjredimmieh orre saemiedigkieboelhkese

Daate sjugniehtåvva veeljemebiejjien raejeste goske orre Saemiedigkiem konstitueereme golken 20.b. 2021.

Prognovsh jïh annjebodts illedahkh saemiedigkieveeljemistie 2021 nedtesæjjan valgresultat.no iktemearan båetieh mænngan mierie nåhka skiereden 13.b. 2021 ts. 21.00.

Veeljemisnie 2017 aktem annjebodts veeljemeilledahkem utni veeljemejijjen, jïh prognovse dej bïjre mah Saemiedigkien sijse båetieh maahta joe gaskejijjen åvtelen båetedh. Dihte minngemes ryöknedimmie sæjhta ånnetji finkesidh, jieh veanhtede unnemes akte våhkoe vaasa åvtelen veeljeme gaervies ryöknesovveme. Seamma vuekie aaj stoerredigkieveeljemisnie åtnasåvva.

Veeljemen mænngan Saemiedigkie edtja veeljemeilledahkem jååhkesjidh jïh tjirkijh Saemiedigkien stoerretjåanghkoeståvrose, faagemoenehtsidie jïh jeatjah moenehtsidie joekedidh mejtie Saemiedigkie lea tseegkeme. Rïhpestimmie Saemiedigkien orre boelhkeste mij vaasa njieljie jaepieh, lea golken 20. b. 2021.

Gosse veeljemeilledahke lea gaervies jïh Saemiedigkien veeljememoenehtse lea luhpiehtimmide seedteme, ryöjreden elliesfaamoemoenehtse edtja abpe veeljemem gïehtjedidh. Daate moenehtse veeljesovvi minngemes stoerretjåanghkosne. Goske daate moenehtse lea luhpiehtimmide jååhkesjamme doh orre tjirkijh annjebodts juhtieh.

Gosse doh orre saemiedigkietjirkih gaavnedieh golken 20.b. dellie stoerretjåanghkoem konstituerede. Gosse tjirkijh sijjen sijjieh stoerretjåanghkoesavkesne vaeltieh, dellie sijjen veeljemegievlien mietie tjahkasjieh. Veeljemeilledahke muana gusnie fïereguhte edtja tjahkasjidh. Jïjtsh sijjieh presideentese jïh raerielïhtsegidie.

Veeljemegievlien voestes tjirkije luhpiehtimmide buakta. Dan mænngan stoerretjåanghkoe luhpiehtimmiemoenehtsem veeljjie mij edtja minngemes jååhkesjimmiem luhpiehtimmijste darjodh. Mubpien biejjien golken 21.b. stoerretjåanghkoe vihth gaavnede jïh dellie Saemiedigkie dam minngemes jååhkesjimmiem veeljemeilledahkeste dorje, jïh aaj tjirkijijstie. Dan mænngan stoerretjåanghkoe sov barkoem aalka jïh voestegh stoerretjåanghkoen tjåanghkoeståvroem veeljie. Mænngan tjåanghkoeståvroe lea veeljesovveme, dellie dah Saemiedigkien stoerretjåanghkoem stuvrieh.

Stoerretjåanghkoe dan mænngan Saemiedigkien presideentem veeljie mij sov politihkeles bæjhkoehtimmiem åehpiedahta jïh raerielïhtsegidie nammohte. Presideente jïh raerielïhtsegh sijjen sijjieh laehpieh goh stoerretjåanghkoetjirkijh jih dej sæjjasadtjh sijjiem vaeltieh stoerretjåanghkose.