Mænngan Ööhpehtimmiedirektoraate lea moeneme Åarjelsaemien Vierhtiesåafoe ij edtjh vielie noerhtesaemien gïelelïerehtimmiem faalehtidh, Saemiedigkie lea maajhööhpehtimmiem digkiedamme staateraerine Tonje Brenna (Bk).

Mikkel Eskil Mikkelsen Árvu/Sametinget

– Dïhte voestes maam Saemiedigkie lea dorjeme lea hoksedh ij naan learohkh sïjhth lïerehtimmiem noerhtesaemien gïelesne dassedh. Dovne Ööhpehtimmiedirektoraate jïh Maahtoedepartemeente leah dam vihtiestamme, saemiedigkieraerie Mikkel Eskil Mikkelsen (NSR) jeahta.

Ij ellies soejkesje

Mikkelsen meala jarkelimmieh Åarjelsaemien Vierhtiesåafoen stillemisnie vuesiehtieh mah haestemh saemien maajhööhpehtimmiem utnieh. Dïhte gyhtjelassem buakta gubpede learohkh edtjieh maajhööhpehtimmiem åadtjodh daelie, jïh mejtie faalenassem guessievïesehtimmien bïjre åadtjoeh jeatjah skuvline.

– Ij guhte dejstie giejgujmie Saemiedigkie lea aamhtesem digkiedamme leah maahteme hijvenlaakan vaestiedidh guktie edtja ööhpehtimmiefaalenassem daelie öörnedh. Jienebh dejstie mah noerhtesaemien maajhööhpehtimmiem faalehtieh, Saemiedægkan bievnieh dah vaenebe vaenebe barkoefaamoem åadtjoeh, jïh tjuerieh ööhpehtimmiem prioriteeredh desnie gusnie leah. Aamhtese Åarjelsaemien vierhtiesåafoen bïjre rïektesisnie vuesehte ellies strategije jallh soejkesje maajhööhpehtæmman ij gååvnesh gænnah dejtie båetije jaepide, Mikkelsen jeahta.

Saemiedigkie lea raeriem buakteme ihke lea daerpies vuartasjidh guktie maajhööhpehtimmiem jïh gïelegaavnedimmieh abpe laantesne öörnie. Mikkelsen gegkeste aaj reerenasse vuajna dïhte lea daerpies.

– Mijjieh daarpesjibie naakenh mah maehtieh learohkelåhkose vuartasjidh tïjje doekoe, jïh lïerehtimmiem dan mietie soejkesjidh jïh dimensjoneeredh. Mijjieh aaj daarpesjibie naakenh mah guessievïesehtimmiem evtiedieh. Gosse pedagogh jïh faagebyjresh gyhtjelassh gïelegaavnedimmiej bïjre gihtjieh jïh mah faagebyjresh mah edtjieh dam faalehtidh, dellie dah leah legitijme gyhtjelassh mejtie tjoerebe veelelaakan digkiedidh.

Öörnemistie lïeredh soemen bielesne

Soemesne akte jallh göökte aktöörh mah maajhööhpehtimmiem jïh gïelegaavnedimmieh iktedieh. Mikkelsen mïelen mietie maahta aaj naemhtie nöörjen bielesne darjodh.

– Mijjieh vierhtiej bïjre soptsestibie. Dan guhkiem mijjieh lohkehtæjjah fååtesibie, dellie ij gåaredh akte lohkehtæjja ajve akti akti learohkem ööhpehte. Tjoerebe maehtedh learohkh mah leah seamma njieptjesne, tjåanghkan bïejedh seamma ööhpehtimmietæjmose, guktie barkoefaamojde buerebelaakan nuhtebe.

Mikkelsen aaj meala daelie gujht tïjje båateme reerenasse guhkiebasse barka raeriestimmiejgujmie råajvarimmide salkehtimmeste NBS 2016:18 – Vaajmoegïele.

– Joe 2016 Vaajmoegïele råajvarimmiem raeriesti raaktan dïsse, jïh daelie gujht tïjje båateme reerenasse daejnie råajvarimmine guhkiebasse barka, Mikkelsen jeahta.

Jis gihtjehtimmie jallh gyhtjelassh, gaskesadth saemiedigkieraeriem Mikkel Eskil Mikkelsen (NSR), tell. +47 917 42 161, mikkel.eskil.mikkelsen@samediggi.no