Saemiedigkie regionaale barkoem Saetniesvoete- jïh liktemekommisjovnen reektehtsinie tjïrrehte. Bielie dehtie barkoste govlehtimmieh jïh åålmegetjåanghkoeh hööltesuvvieh gaajhkine Saemiedigkien veeljemegievline. Aarebi seammaleejns prosessh tjïrrehtamme Noerhten, Åarjelsaemien, Luvlien jïh Vesthavet veeljemegievlesne. Daelie Åarjel-Nöörjen våaroe.
Tjaktjen doekoe govlehtimmiem öörnedehtebe abpe veeljemegeavlan, seamma aejkien ræhpas åålmehtjåanghkoeh tjïrrehtibie Stavangerisnie, Bergenisnie jïh Oslovisnie. Saemiedigkiepresideente Silje Karine Muotka (NSR) meatan tjåanghkojne.
– Galkebe liktemebarkojne lahkaskidh, mijjieh tjoerebe daejredh guktie daaroedehteme ennje almetji jielemh daan biejjien dæjpa. Mijjieh sïjhtebe dovne haestiemidie, dååjrehtimmide jïh raeride govledh. Raerieh gelkieh jis Saemiedigkiem viehkiehtidh råajvarimmieh evtiedidh mah maehtieh vihties daerpiesvoeth saemien seabradahkesne vaestiedidh, Muotka jeahta.
Sæjhta vielie gïelh govledh
Saemiedigkie sæjhta dovne njaalmeldh raerieh åålmehtjåanghkojne jïh tjaaleldh raerieh govlehtimmien tjïrrh.
– Barkoe Saetniesvoete- jïh liktemekommisjovnen reektehtsinie ij leah barre daaroedehtemen konsekvenside guarkedh. Aaj guktie båetije biejjide tseegkedh gusnie saemiengïele, kultuvre jïh identiteete hijven nuepide evtiedæmman utnieh. Daan gaavhtan mijjieh raerieh dejstie gïeh tsiehkiem bööremes daejrieh daarpesjibie, Muotka jeahta.
Tjaaleldh govlehtimmien mierie rahkan 23. biejjien 2026.
Daase maahtah govlehtimmie-vaestiedassem seedtedh: Govlehtimmie: Daerpiesvoeth saemien faaleldahkide, öörnegidie jïh råajvarimmide Åarjel-Nöörjen veeljemegievlesne
Maahtoem daarpesjibie guktie åvtese juhtedh
Saemiedigkie sæjhta govlehtimmien tjïrrh joekoen daejredh mejtie daerpies veeljemegievlesne guktie gïelem, kultuvrem jïh identiteetem nænnoestidh. Saemiedigkie aaj sæjhta raerieh guktie tjïelth, ööhpehtimmieinstitusjovnh, kultuvreaktöörh jïh jeatjebh maehtieh dejnie barkojne viehkiehtidh, jïh aaj magkerh råajvarimmieh jïh öörnegh byöroe evtiedidh.
– Dååjrehtsh Åarjel-Noörjeste leah måedtieleejns. Naan byjjenamme saemien gïeline jïh kultuvrine, mearan jeatjebh dååjrehtamme gïelem, ektievoetem jïh saemien vuekide dassedh. Seammasïenten mijjieh stoerre eadtjohkevoetem vuejnebe saemien gïelem jïh identiteetem nænnoestidh. Mijjieh sïjhtebe govledh mah leah daerpies lïhkesdajvesne dam evtiedimmiem dåarjodh, Muotka jeahta.
Saemiedigkie gaajhkesh giej dååjrehtimmieh, daerpiesvoeth jallh raerieh haasta meatan prosessesne årrodh.
Åålmegetjåanghkoej aejkiemierieh jïh sijjieh
- Stavanger: golken 28. biejjien ts. 18.00-20.00, Folkets Hus, Savka 1.
- Bergen: golken 29. biejjien ts. 18.00-20.00, Litteraturhuset Bergenisnie, Amalie Alver-tjiehtjelisnie.
- Oslove: rahkan 5. biejjien ts. 18.00-20.00, Litteraturhuset Oslovisnie, Skram- tjiehtjelisnie.