– Mijjieh lahtesh dan bïjre vadteme gaajhkine juhtije prosessine jïh jieniebinie konsultasjovnine Maahtoedepartemeentine. Dan åvteste joekoen hijven vuejnedh mijjen barkoe maahtoeevtiedimmien bïjre daelie illedahkh vadta jïh moenehtse minngie- jïh jåarhkeevtiedæmman maanagïertesne jïh skuvlesne mijjen lahtesh dåarjohte, jïh daelie dam raereste goh akte råajvarimmie, saemiedigkieraerie Mikkel Eskil Mikkelsen (NSR) jeahta.
Mikkelsen jeahta saemiedigkieraerie lea vuajneme öörnege voenges maahtoelutnjeminie ij juhtieh. Ij guhte bijjieguvviem utnieh mah voenges daerpiesvoeth saemien maanagïertesuerkie åtna, jïh magkeres maahtoefaalenasse mij lea vadtasovveme jïh vadtasåvva.
Daelie seabradahke maahtoeaehpiem dååjroe jïh faagealmetjh fååtesieh, seammalaakan saemien maanagïertesuerkesne abpe laantesne. Stoerre haestemh maanagïerteaajhteridie saemiengïeleldh barkijh dåårrehtidh jïh utniehtidh, dan åvteste sïejhme barkoemaarkede dej mietie gihtjie. Baalhkanjieptjie maanagïertesuerkesne ij maehtieh jeatjah suerkiejgujmie gaahtjedh.
– Daate tsiehkie kvaliteetem saemien sisvegasse maanagïertine baajnehte. Saemiedigkie joekoen tjoeperde daan tsiehkien gaavhtan saemien maanah eah sijjen reaktam åadtjoeh akten maanagïertefaalenassese mij saemien gïelem jïh kultuvrem betnesne åtna, naakede mij lea tjïelke aajhtoe saemien maanaj reaktajearsoesvoetese. Saemiedigkie sæjhta dan åvteste prioriteeredh barkedh ihke mierieh jïh struktuvrh saemien maanagïerti jïh jeatjah maanagïerti bïjre saemienfaalenassine sjiehtedamme sjidtieh maanagïerten daerpiesvoetese, Mikkelsen jeahta.
Saemiedigkien stoerretjåanghkoe edtja duarstan daan våhkoen saemiedigkieraerien reektestimmiem kvaliteeteevtiedimmien bïjre saemien maanagïertesuerkesne gïetedidh. Akte Saemiedigkien råajvarimmijste lea Saemiedigkien dåarjoeöörnegh sjiehtedidh guktie maahtoeevtiedimmiem vadta. Saemiedigkie vuarjesje mejtie edtja krïevedh maanagïerth mah dåarjoem åadtjoeh edtjieh maahtoelutnjemekrïevenassh fulkedh jïh gïelebarkoem nænnoes gïelemaalli mietie öörnedh.
Aamhtesetjaatsegh aamhtesasse 38/22 Saemiedigkieraerien reektestimmie kvaliteeteevtiedimmien bïjre saemien maanagïertesuerkesne
Moenehtse minngie- jïh jåarhkeööhpehtæmman maanagïertesne jïh skuvlesne lea salkehtimmiem NOU 2022: 13: Med videre betydning – Et helhetlig system for kompetanse- og karriereutvikling i barnehage og skole deelleme skïereden 28.b. 2022 Maahtoedepartemeentese, gusnie jienebh råajvarimmieh raeriestieh mah edtjieh ellies jïh ihkuve systeemem tseegkedh maahtoe- jïh karrijeereevtiedæmman maanagïertesne jïh skuvlesne.
Jis gihtjehtimmie jallh gyhtjelassh, gaskesadth saemiedigkieraeriem Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no