Nöörjen staate lea dåarjoem saemien learoevierhtide giehpiedamme, man åvteste Saemiedigkie tjuara prioriteeremidie jarkelidh saemien learoevierhtide.
– Saemiedigkie vuajna daerpies produksjovnem learoevierhtijste prioriteeredh dejnie faagine gusnie Saemiedigkie learoesoejkesjh nænnoste. Mijjieh veanhtadibie Maahtoedepartemeente stuerebe dïedtem vaalta saemien learoevierhtieh faagine darjodh gusnie Maahtoedepartemeente learoesoejkesjh nænnoste, Mikkelsen jeahta.
Juktie kvaliteetem learoevierhtieproduksjovnesne hoksedh saemiedigkieraerie sæjhta kvaliteetekriterijumh saemien learoevierhtide evtiedidh. Saemiedigkieraerie lea revideereme dahkoesoejkesjisnie faageprioriteeremh jaapan 2023 staeriedamme, jïh prioriteereme jaapan 2024, mah edtjieh våaroeminie årrodh learoevierhtieevtiedæmman doh mubpie göökte jaepieh Saemiedigkesne.
– Jalhts libie faagh prioriteereme, sïjhtebe iktesth ræhpas årrodh daerpiesvoeth digkiedidh mah learoevierhtietsiehkesne heannede saemien skuvline, jïh tsiehkiem dan bööremeslaakan gåarede, Saemiedigkien mieriej sisnjeli sjïehteladtedh, Mikkelsen jeahta.
Saemiedigkieraerie åtna goh daerpies jåerhkedh digitaale learoevierhtieh prioriteeredh, mah leah daanbeajjetje laakekrïevenassi jïh dåajvoej mietie. Annje saemien learoevierhtieh fååtesieh, jïh daerpies learoevierhtieh dallatjinie geervehtidh.
– Sïjhtebe jåerhkedh prosjekth prioriteeredh radtjoes produksjovnetïjjine, jïh prosjekth galhkedh mejtie eah leah tjirrehtamme don vihties tïjjen sisnjelen maam Saemiedigkie maahta jååhkesjidh, Mikkelsen jeahta.
Saemiedigkieraerie aaj vuajna saemien learoevierhtiej bïjre bievnedh jïh dejtie maarkedese åehpiedehtedh, tjïelke barkoem kreava vihties ulmien vööste. Utnijh saemien learoevierhtijste lahtestieh sijjieh buerebe åehpiedehtemem orre learoevierhtijste ohtselieh.
– Daerpies råajvarimmiejgujmie mah åehpiedehtemem maarkedese bueriedieh saemien learoevierhtiej bïjre. Sïjhtebe dan åvteste daan boelhken gaajhkh bielieh vuarjasjidh jïh råajvarimmiejgujmie nierhkedh mah bievnemem learoevierhtijste bueriedieh, Mikkelsen jeahta.
Saemiedigkien stoerretjåanghkoe aamhtesem 055/22 Dahkoesoejkesje learoevierhtieevtiedæmman 2020-2024 – revideereme stoerretjåanghkosne gïetede duarstan, goeven 8.b.
Aamhtesen aamhtesetjaatsegh
Jis gihtjehtimmie jallh gyhtjelassh, gaskesadth saemiedigkieraeriem Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no