Mijjieh sårkoen sjuvvesjem dååsteme, Gånka Harald V lea sealadamme. Saemien åålmege sårkosne.
Nöörjen Gånkagåetie lea tjïelkeslaakan saemien åålmegem, saemien kultuvrem jïh mijjen gïelide guhkiem dåarjelamme. Gånka Harald feerhmeles faamojne orreme, jïh viehkiehtamme Gånkagåetiem tjåadtjoehtidh goh vihkeles saemide.
Mijjieh Gånkagåetiem buarasjibie jïh mijjieh eejnegen Gånka Haraldem buarasjamme. Mijjieh dååjrehtibie aavoe lij gåabpegi bielijste.
Gånka jaabnan Saapman guessine feeleme, jeatjah gaskem Saemiedigkien aerpievuekien jïh vyörtegs rïhpestæmman fïerhten nealjeden jaepien. Altese baakoeh desnie, ihke Nöörje lea tseegkesovveme göökti åålmegi dajvesne, eevre vihkeles saemide jïh saemien politihken evtiedæmman orreme.
Gånka lij aaj meatan vihkeles öörneminie. Åajvah jïh vihkeles deahpadimmie saemide gåessie dovne Gånka jïh Kråvnaprinse meatan årroejigan Saemiedigkien låhkeden rïhpestimmesne Kárášjohkesne golken 2025.
Aaj åajvah saemide Oslovisnie, gåessie Gånka saemien åålmegebiejjiem heevehti 500 guessiej gujmie Osloven Raeriegåetesne jaepien 2023. Golken 2022, Gånka guessine åarjelsaemiej luvnie Snåasesne Gïelevåhkoen rïhpestimmesne.
Gånkapaarren feeleme åarjelsaemien dajvide åarjemes Nordlaantesne giesien 2023 lij stoerre aarvoe åarjelsaemide. Daennie feeleminie dah guaktah Saetniesvoete- jïh liktemekommisjovnen reektehtsen vihkelesvoeten bïjre soptsestigan.
Gånka aaj sov boelhken tjïrrh saemien tjirkijh dejtie byjjes öörnemidie Slåahtesne bööreme. Dïhte mijjine, gïeh dam earoem åtneme altese sïelskesne årrodh, eejnegen tryjjesvoetine, heehkesthvoetine jïh ïedtjine dïervesji. Eejnegen goh voelpine guhkede gietjeste dïervesjidh.
Joekoen vihkele mijjide Gånka Harald ïedtjevoetem vuesiehti mijjen barkose saemien gïelide vååjnedehtedh. Gånka gellien aejkien Saepmesne feeleme, dovne privaate jïh byjjes feelemh, jïh dïhte daamtaj vaajmoste soptsesti sov dååjrehtsi bïjre jïh almetji bïjre giej gujmie dïervesjamme Saepmesne.
Daej jaepiej tjïrrh, joekoen byjjes jïh fuelhkien deahpadimmine, Gånka vuesiehtamme dïhte dovne vietjeles jïh tryjjes almetje lustesaajmojne. Mijjen lij hijven jïh vietjeles gånka, jïh sov lij joekoen vuekie hoksem vuesiehtidh dejtie giej gujmie rïjhkesne dïervesji.
Gånka Harald lij feerhmeles almetje jïh saemiej tsiehkiem guarkaji. Sov lij stoerre jïh vihkeles jielemebarkoe.
Altese håaleminie nasjovnese dïhte buektiehti ovmessie dåehkieh seabradahkesne feerhmedh jïh ektiedidh. Gånka Harald lij åajvah almetje, gie mijjem dïjpi.
Gånkan fuelhkie daelie båata lïeredh guktie geelleben, aehtjeben, voehpeben jïh aajjeben namhtah jïeledh.
Saemien åålmegistie sïjhtem gånkafualhkan vaajmoste sårkoem gaatelassjedh. Dijjen sårkoem guedtebe.
Daajhtije Áillohaš lij akte mijjen stööremes daajhtijijstie. Dïhte tjeeli:
ja go visot lea meaddel
ii gullo šat mihkkege
ii mihkkege
ja dat gullo
***
og når alt er forbi
høres ingenting lenger
ingenting
og det høres
Gånka lea sealadamme – Jielieh Gånka.
Kongen er død – Leve Kongen.