Skuvlen mænngan lea gïeleskreejremeprosjekte mij learoehkidie voestes klaassen raejeste njealjeden klaassen raajan sjeahta mij edtja viehkiehtidh åtnoem åarjelsaemiengïeleste nænnoestidh jïh lissiehtidh goh aarkebiejjien gïele skuvleastoeaejkienöörnegisnie (SAÖ) gïelelïerememaallen tjïrrh gïeletjiehpije. Gïeletjiehpije lea gïeleskreejrehtæjja gie lïhke maanajgujmie barka ovmessie teemajgujmie jïh darjomigujmie saemiengïelesne.

Rossen tjïelte lea skuvlejaepien 202/2021 mænngan daan raajan prosjektem Skuvlen mænngan evtiedamme jïh tjïrrehtamme, jïh Rossen tjïelte vuajna daerpies faalenassem jåerhkedh jïh vijriebasse evtiedidh.

– Vihkele gïeleareenah maanide jïh noeride utnedh, aaj sïejhme skuvletïjjen ålkolen. Gïeleareena mij lea vïedteldihkie skuvleastoeaejkieöörnegasse lea hijven gïeleareena, gusnie maanah leah stååkedæmman jïh lïeremasse tjåanghkenamme skuvletïjjen mænngan. Dagkerh areenah viehkiehtieh gïeleåtnoem dåarjoehtidh jïh gïelese stuerebe aarvoem vedtieh. Sjollehke maehtedh dagkeres gïeleareenam dåarjoehtidh, saemiedigkieraerie Mikkel Eskil Mikkelsen (NSR) jeahta.

Rossen tjïelte tjierteste man vihkele lea nuekie maehteles vierhtiealmetjh utnedh åarjelsaemien gïele- jïh kultuvremaahtojne. Mikkelsen jeahta vierhtiealmetjh leah stööremes eaktoe jis edtja gïelelierehtimmine lyhkesidh.

– Saemiedigkie dan åvteste vuajna vihkele saemiengïeleldh almetjh dåårrehtidh mah maehtieh gïeleareenah maanide saetniedehtedh. Ööhpehtimmie jïh nænnoestimmie saemien gïeleste leah vihkele ulmie Saemiedægkan, jïh Saemiedigkien jïjtse gïelestrategijesnie Gïelelutnjeme, gïeleråajvarimmieh maanide jïh noeride leah jïjtse barkoesuerkie, gusnie hijven gïelelierehtimmie lea jarngesne.

Dåarjoe 200 000 kråvnine vaaltasåvva dåarjoeöörnegistie Saemien gïeleråajvarimimeh åarjel-, upmeje-, bidum-, skolte- jïh markasaemien dajvesne.