– Gaatesjen daejrebe gellie aalkoeåålmegenyjsenh sveekes åadtjoeh meatan årrodh sjæjsjalimmieprosessine mah leah dej bïjre. Daate stoerre dåeriesmoere gosse daejrebe aalkoeåålmegi nyjsenh jïh nïejth daamtaj leah lissie aajhtoen nuelesne, jïh sïerredimmiem dååjroeh jienebi fåantoej gaavhtan. Mijjieh sïjhtebe saemien perspektijvh tjåanghkosne lutnjedh jïh solidariteetem jeatjah aalkoeåålmegigujmie vuesiehtidh, saemiedigkieraerie Maja Kristine Jåma jeahta.

Teemah daan jaepien EN-tjåanghkosne leah giefiesvoetem nåhkehtidh, institusjovnh nænnoestidh jïh beetnehvierhtiedåarjoe tjoeleperspektijvine. Kultuvre- jïh mïrrestallemeministeere Lubna Jaffery lea åvtehke Nöörjen delegasjovnesne Nyjsenekommisjovnese, lissine staatetjaelije Erlend Kaldestad Hanstveit Kultuvre- jïh mïrrestallemedepartemeenteste jïh staatetjaelije Bjørg Sandskjær Ålkoerïjhkedepartemeenteste sijhtieh fïereguhten våaroem vaeltedh. Tjåanghkosne edtja galhkuvetjaatsegen bïjre råårestalledh mïsse Saemiedigkie lahtesh deellie.

Saemiedigkieraerie lea meatan byögkeles rïhpestimmesne Nyjsenekommisjovneste, paneeledigkiedimmesne noerhtelaanti maalli bïjre mïrrestallemasse, jïh jienebh tjåanghkoeh soejkesje, dovne bilateraale jïh sivijle seabradahkigujmie. 

EN:n ihkuve aalkoeåålmegeforume 2023 aktine tjïelke haestieminie Nyjsenekommisjovnese bööti don guhkiebasse barkoen bïjre EN:n Nyjsenemoenehtsen juvnehtimmeste aalkoeåålmegenyjseni jïh nïejti reaktaj bïjre maam tjuara bæjjese fulkedh. Sïjhtem aaj ektiedimmiem åvtese lutnjedh gaskem klijmajarkelimmieh, eatnemeteehpemem jïh giefiesvoetem aalkoeåålmegenyjseni gaskem. Gosse våarome mijjen jieliemassese gaarvene, dellie dïhte giefiesvoetem sjugnede mij joekoen nyjsenidie baajnehte, saemiedigkieraerie jåarhka.

Aalkoevåarome ihke Saemiedigkie lea meatan EN:n 68. Nyjsenekommisjovnesne lea Biejjienaalkoe-bæjhkoehtimmie, Sábme jállu – Saemiedigkien bïevnese mïrrestallemen bïjre (2020) jïh Saemiedigkiebïevnese aalkoeåålmegi reaktaj, solidariteeten jïh gaskenasjonaale barkoen bïjre (2023).