Saemiedigkieraerien reektestimmie saemien filmen bïjre suerkiem buerkeste, jïh dovne definisjovnem jïh aarvoesvaalhtesem saemien filmesne lïhkebe vuartesje, seamma tïjjen goh haestemh jïh strategijh gïetede mej uvte saemien filmesuerkie tjåådtje.

– Saemien filme gaajh sjïere evtiedimmiem åtneme, men såemies haestemh åtna dam sjïdtije produksjovnedaltesem dåastodh jienebi stoerre saemien produksjovnigujmie dej båetiji jaepiej, saemiedigkieraerie Maja Kristine Jåma (NSR) jeahta.

Saemiedigkieraerien reektestimmesne saemien filmen bïjre ovmessie dåeriesmoerh jïh strategijh åehpiedahta, mejtie maahta nuhtjedh saemien filmen daerpiesvoeth jïh evtiedimmienuepieh illedh. Filme lea medijume mij viehkehte saemien åålmegen histovrijem soptsestidh. Dan åvteste aaj vihkele saemien jïjtjenænnoestimmiem gorredidh viehkine hoksedh saemieh dah, mah dam minngemes sjæjsjalimmiem vaeltieh mah saemien produksjovnh mah edtjieh dorjesovvedh.

Saemiedigkieraerie ulmine åtna låhkoem saemien filmijste lissiehtidh, jïh jienebh filmh aaj ovmessie saemien gïeline båetieh. Daate akte suerkie naa jolle åasajgujmie, men mij aaj maahta lissiehtamme aarvoesjugniedimmiem saemien dajvine vedtedh. Læjhkan daerpies lissiehtamme budsjedtemieriejgujmie edtja lissiehtimmiem hoksedh saemien  guhkiesformaateproduksjovnine jïh dubbadamme filmijste.

– Sïjhtebe barkedh filmeinstituhtem Internasjonalt Samisk Filminstitutt (ISFI) nænnoestidh, jïh viehkiehtidh ISFI:n raastendåaresth barkoefaamoe lissiehtamme jååhkesjimmiem åådtje viehkine ektie barkoem vååjnedehtedh, evtiedidh jïh gorredidh dovne nasjonaale, noerhtelaanti jïh arktiske daltesisnie, juktie buerebe beetnehdåarjoeöörnegem sjïehtesjidh.

Saemiedigkien stoerretjåanghkoe reektestimmiem gïetede bearjadahken, njoktjen 10.b.

Jis gyhtjelassh medijeste jallh mubpijste, gaskesadth saemiedigkieraeriem Maja Kristine Jåma (NSR), mob. +47 472 42 366, maja.kristine.jama@samediggi.no