Jarkelimmien våarome

Saemiedigkie uvtede saemiengïeleldh maanagïertefaaleldahken dåarjoeöörnegidie jeatjahtehtedh guktie gïelebarkoen kvaliteetem nænnoestidh jïh maanaj saemiengïelem, kultuvrem jïh identiteetem buerebe evtiedidh.

Vierhtiedimmieh jïh maanagïertesuerkien evtiedimmie vuesiehtieh daanbeajjetje öörnegh eah leah nuekies sjiehteles daerpiesvoetide. Daerpies tjïelkebe ulmieh utnedh, vielie systematihkeles gïelebarkoem utnedh jïh dåarjoevierhtieh vielie rïekteslaaketje joekedidh.

Datne maahtah raerieh måedtie-leejns vuekine buektedh 

• Goeren tjïrrh (dellie maahtah tsiemedh):  Juhtehth elektronihkeles goerem
• Tjaaleldh prievine: Sámediggi – Sametinget, postboks 3, 9735 Kárášjohka/Karasjok
• Tjaaleldh e-påastine: samediggi@samediggi.no

Mïerhkh vaestiedassem «Uvtelasse Saemiedigkien dåarjoeöörnegidie jeatjahtehtedh maanagïertide saemiengïeleldh faaleldahkine»

Govlehtimmiemierie

Govlehtimmiemierie mïetsken 21. biejjien 2026

Tjaatsegh

Vïedtjh sjiehteles tjaatsegh:

• Govlehtimmieprievie: Høring - Forslag til endring av Sametingets tilskuddsordninger til barnehager med samiskspråklig tilbud (PDF, 510 kB)
• PwC Saemiedigkien dåarjoeöörnegem maanagïertide vierhtiedamme. Lohkh reektehtsem: Evaluering av Sametingets søkerbaserte tilskudd til barnhehager - pwc (PDF, 3 MB)

• Faamohks gïelemodellh-reektehtse: 
  • Daaroen: Sterke språkmodeller (PDF, 696 kB)
  • Åarjelsaemien: Faamohks gïelemodellh (PDF, 815 kB)
  • Julevsaemien: Nanos giellamodella (PDF, 740 kB)
  • Noerhtesaemien: Gievrras giellamodeallat (PDF, 691 kB)
• Pedagogeles prinsihph saemien maanagïertide:
  • Daaroen: Unna olbmožiid árgabeaivi mánáidgárddiin - Pedagogiske prinsipper for samiske barnehager (PDF, 617 kB)
  • Noerhtesaemien: Unna olbmožiid árgabeaivi mánáidgárddiin - Pedagogalaš prinsihpat sámi mánáidgárddiide (PDF, 469 kB)

• Vierhtiedimmie Saemiedigkien dåarjoeöörnegijstie maanagïertide: Evaluering barnehagetilskudd, Nordlandsforskning (PDF, 5 MB)

Daejtie jarkelimmide uvtedamme:

Saemiedigkie uvtede:

• daanbeajjetje dåarjoeöörnegidie tjöönghkedh orre, tjåenghkies öörnegasse saemiengïeleldh maanagïertefaaleldahkese
• golme gïeledaltesidie (daltesejoekedimmie-modelle) darjodh maanagïerten gïeletsiehkien mietie
• ryöknemem dåarjoste jeatjahtehtedh goevteselåhkojste maanaj jïh saemiengïeleldh barkiji låhkose
• tjïelkebe krïevenassh systematihkeles gïelebarkose maanagïertine, jïh maanah saemiestieh gåessie maanagïerteste skuvlese juhtieh
• gïelebarkije (sámástahtte) lissine maanagïertine tjirkedh
• evtiedimmievierhtieh gelkieh nuhtjesovvedh gïelebarkoen kvaliteetem tjirkedh, gïelebarkosne galka faamohks gïelemodellh jïh pedagogeles prinsihph vyjrehkåbpoe evtiedidh.
• öörnegem aelhkiedehtedh aktine goerine jïh aktine reektehtimmine

Lissine uvtedamme öörnegem prosjeektide jïh evtiedimmiebarkose jeatjahtehtedh öörnegasse gusnie aerpievuekien maahtojne barkedh saemien maanagïertine.

Saemiedigkien dåarjoe maanagïertide lea ekonomeles dåarjoeöörnegh mah gelkieh tjirkedh saemien maanah saemiengïeleldh maanagïertefaaleldahkem åadtjoeh. Vierhtieh gelkieh provhkesovvedh maanagïerten gïelebarkoen kvaliteetem lutnjedh.

Öörnege dovne saemien maanagïertide jïh jeatjah maanagïertide gusnie saemien maanah jïh saemien gïeleööhpehtimmiem faalehtieh.  Dåarjoe lissine sïejhme beetnehvierhtide mejtie maanagïerth staateste åadtjoeh tjïelten mieriedåarjoen tjïrrh.

Tabelle vuesehte daaletjen dåarjoeöörnegh jïh jarkelimmieh mah leah uvtedamme:

(∗ åasa stuvresåvva fïerhten jaepien)

Åenehks buerkiestimmie

• Orre öörnege vihties maaksoemieriem pråvhka fïereguhte maanide jïh barkijidie
• Evtebe öörnegen våarome lij goevtesh jïh barkijh
• Orre modelle vielie rïekteslaaketje joekedimmietjoevtenjem vadta