Bieline Saetniesvoete- jïh liktemekommisjovnen reektehtimmien regionaale barkoste, Saemiedigkie galka govlehtimmieh jïh almetjetjåanghkoeh gaajhkine veeljemedajvine utnedh. Saemiedigkie dejtie voestes govlehtimmide jïh almetjetjåanghkojde tjïrrehtamme Noerhten veeljemedajvesne daan gïjren. Daelie Åarjelsaemien veeljemedajven våaroe.
Silje Karine Muotka
Árvu/Sámediggi
Govlehtimmie abpe veeljemedajvem sjædta, jïh aaj ræhpas almetjetjåanghkoeh Plaassjesne, Tråantesne, Nåavmesjenjaelmesne jïh Måefesne. Saemiedigkiepresideente Silje Karine Muotka (NSR) jïh saemiedigkieraerie Paul Bendikk Jåma (NSR) galkijægan gaajhkine tjåanghkojne meatan årrodh.
– Mijjieh veeljeme almetjetjåanghkoeh ovmessie sijjine åarjelsaemien veeljemedajvesne utnedh, juktie veeljemedajve lea geograafeles vijries dajve. Vihkeles mijjese tjïertestidh, govlehtimmie lea abpe veeljemedajven åvteste, aaj tjïeltide gusnie ibie almetjetjåanghkoeh utnieh. Manne gegkestem årrojh abpe veeljemedajveste dam nuepiem nuhtjieh, saemiedigkiepresideente Silje Karine Muotka haasta.
Govlehtimmie jïh almetjetjåanghkoeh seamma boelhken
Almetjetjåanghkoeh leah ræhpas gaajhkesidie, jïh tjaaleldh govlehtimmie tjïrrehteminie seamma boelhken.
– Mijjieh sijhtebe almetjh dovne tjåanghkose båetieh jïh tjaaleldh raerieh seedtieh. Daaroedehteme saemien seabradahkh joekehtslaakan dievviedamme, dan åvteste davvome tjuara lïhkes jïh regionaale daltesisnie deahpadidh. Mijjieh sijhtebe, govlehtimmieh jïh almetjetjåanghkoej tjïrrh, dah ovmessie dååjrehtsh jïh daarpoeh govledh mah Åarjelsaemien veeljemedajvesne gååvnesieh. Ij leah akte vuekie mij gaajhkesidie sjeahta, jïh mijjieh dijjen gïelh daarpesjibie dejnie hijvenlaakan barkedh, Muotka jeahta.
Tjaaleldh govlehtimmien mierie rahkan 28. biejjien raajan.
Daase maahtah govlehtimmievaestiedassem seedtedh
Saemiedigkie sæjhta govledh
Saemiedigkie sæjhta govledh mah saemien lïhkesseabradahkh jïh aktegsalmetjh daarpesjieh guktie skaarah daaroedehtemen mænngan davvodh. Mijjieh sijhtebe aaj daejredh mah lïhkes saemien aktöörh jïjtje maehtieh darjodh, guktie tjïelth, institusjovnh jïh organisasjovnh maehtieh barkoem dåarjelidh, jïh magkerh råajvarimmieh jïh dåarjoeöörnegh Saemiedigkie byöroe nænnoestidh jallh jeatjahtehtedh.
Saemiedigkie gaajhkesidie haasta, giej lea dååjrehtsh, daarpoeh jallh uvtelassh, barkosne meatan årrodh. Govlehtimmie Åarjelsaemien veeljemedajvesne lea akte gellijste govlehtimmijste. Dah båetiji jaepiej galka seammaleejns govlehtimmieh gaajhkh Saemiedigkien veeljemedajvine årrodh.
Almetjetjåanghkoej aejkiemierieh jïh sijjieh
- Plaassja: Rahkan 11. biejjien, 2025 ts. 18.00-20.00, Storstuggu, Ol-klemmetsaveien 50
- Tråante: Rahkan 12. biejjien, 2025 ts. 17.30-19.30, Magistratsalen, Litteraturhuset Tråantesne, Kongens gate 2
- Nåavmesjenjaelmie: Rahkan 26. biejjien, 2025 ts. 18.00-20.00, Scandic Rock City, Sverres gate 35
- Måefie: Rahkan 27. biejjien, 2025 ts. 18.00-20.00, Teaterkafeen Nordlaanten teaaterisnie, Rådhusalleen 6