Reerenasse lea sov raeriestimmesne staatebudsjedtese 2023 lissiehtimmiem 13,5 millijovnh kråvnine Saemiedægkan raeriestamme, jallh 2,35 %. Daate lea vaenebe goh åasalissiehtasse staatebudsjedtesne 3, 5 %.
– Staatebudsjedten gaavhtan saemiedigkieraerie lea tjoereme såemies geerve veeljemh vaeltedh gosse Saemiedigkien budsjedtine barkeme. Mijjieh nuepieh budsjedtesne ohtsedibie guktie maehtebe dovne haestemh saemien seabradahkesne loetedh, seamma tïjjen goh tjirkebe saemien kultuvre- jïh gïelebarkijh baalhkalissiehtassem åadtjoeh 2023, budsjedten tjåadtjoehtæjja saemiedigkieraerie Runar Myrnes Balto (NSR) soptseste.
Stööremes åejvieråajvarimmie lea saemien maanagïerth, mah tjåanghkan 4,8 millijovnh kråvnah vielie åadtjoeh 2023. Dah 3 millijovnh kråvnah namhtah saemien maanagïertefaalenassese raereste, aaj Noerhte-Romsan åerjielisnie, naakede maam saemiedigkieraerie bæjhkoehti evteben våhkoen. Jeatjah åejvieråajvarimmieh budsjedtesne leah mearoesaemien reaktah, barkoe saemielaavsemen vööste jïh dåårrehtimmie lohkehtæjjijste jïh maanagïertelohkehtæjjijste.
– Gosse mearoesaemien Borjjadat-råajvarimmiem bæjhkoehtibie dellie dïhte vuesehte mijjieh mearoesaemiej reaktah prioriteerebe jaepiej åvtese. Barkosne saemielaavsemen vööste mijjieh daelie nuepiem vedtebe dåarjoem åadtjodh hööptije barkose, jïh dåårrehtimmieprosjekten tjïrrh mijjen håhkoe lea mijjieh buektiehtibie dam maahtoeaehpiem loetedh maam saemien skuvline jïh maanagïertine daelie vuejnebe, Myrnes Balto jeahta.
Raeriestimmien tjïrrh golme orre institusjovnh ryöktesth dåarjose båetieh budsjedtesne 2023 raejeste. Saemien gåetie Romsesne 500 000 kråvnah åådtje, Bárru giellabáiki Suortesne (Sortland) 800 000 kråvnah åådtje gïehtelæmman gïeleareeneste Lofotenisnie jïh Vesterålesne, jïh DeanuInstituhtta Deatnusne 500 000 kråvnah åådtje.
– Gosse Saemien gåetiem Romsesne jïh gïeleareenam Suortesne dåarjobe mijjieh sïjhtebe jåerhkedh saemien gaavnedimmiesijjieh tseegkedh dejnie dajvine mah eah dam utnieh. Saemien gåetie Romsesne ij leah tseegkesovveme annje, men jaehkebe daate sjugniehtåvva 2023, Myrnes Balto jeahta.
Reerenassen raeriestimmesne staatebudsjedtese dah leah dåarjoem giehpiedamme maam Saemiedigkie åådtje learoevierhtieh darjodh, 9 millijovnh kråvnajgujmie. Daate konsekvensh åådtje Saemiedigkien learoevierhtieproduksjovnese.
– Gaatesjen vuejnebe Reerenasse vierhtieh giehpede mejtie learoevierhtieproduksjovnese åtneme, jïh jaepien 2023 9 millijovnh kråvnah vaenebe sjædta, jis ij dagke Stoerredigkie maahta daam itjmies vuelieprioriteeremem staeriedidh sov gïetedimmesne staatebudsjedteste, Myrnes Balto jeahta.
Saemiedigkieraerien åejvieråajvarimmieh raeriestimmesne saemiedigkiebudsjedtese 2023 (PDF, 127 kB)
Les Sametingets budsjett 2023 - Sametingsrådets forslag til innstilling (PDF, 2 MB)
Jis gihtjehtimmie jallh gyhtjelassh, gaskesadth saemiedigkieraeriem Runar Myrnes Balto (NSR), +47 977 73 778, runar.myrnes.balto@samediggi.no