Dahkoesoejkesje bijjemes strategijine tjaaleme jïh vuesehte guktie maahta vuelie-suerkiem nænnoestidh ektien institusjovnen tseegkemen tjirrh. Dahkoesoejkesje aaj daerpiesvoeth buerkeste, raerieh vihties råajvarimmide sisvegen bïjre buakta, guktie institusjovnem öörnedh jïh finansijeeredh. Bielieh dahkoesoejkesjistie gååvnesieh noerhte-, åarjel- jïh julevsaemien. Daesnie svaalhtesh ovmessie versjovnide:
Våarome
Saemiedigkieraerien Manočalbmi-bæjhkoehtimmesne tjaaleme naemhtie Institusjonelle vuelien hïejmen bïjre:
Laavenjostoeguejmieh sijhtieh barkedh tseegkemen åvteste vuelien institusjonelle hïejmeste, mentovreöörnegh tseegkedh jïh vuelievåarhkoeh jaksoes saemien åålmegasse darjodh, seammasïenten goh mijjieh aaj orre vuelie-bæjhkoehtimmide dåarjobe.
Dehtie våaroemistie Saemiedigkie gïjren 2025 barkoedåehkiem nammoehti mij dahkoesoejkesjem, Vuelien hïejme - dahkoesoejkesje, dorjeme.
Barkoedåehkesne daah meatan orreme:
- Ánde Somby, UiT - Norges Arktiske Universitet jïh joejkije
- Tanja Holmen, Norsk senter for folkemusikk og folkedans
- Johan Vasara, Saemien arkijve
- Ol Johan Gaup, Saemien musihkefestivaale Guovdageaidnu, jïh vielie
Dahkoesoejkesjen tjïrrh barkoedåehkie vihteste ihke byöroe institusjonelle hïejme vuelien åvteste tseegkedh, jïh dahkoesoejkesjisnie barkoedåehkie digkede man åvteste byöroe dagkerem institusjovnem tseegkedh, jïh aaj dam maam byöroe institusjovnen åejvieulmie jïh funksjovnh årrodh. Lissine barkoedåehkie dahkoesoejkesjisnie institusjovnen bijjemes prinsihpide uvtede, mij åajvahkommes saemien reeremen jïh dïedten bïjre.
Dahkoesoejkesjen maahtoevåarome leah göökte reektestimmieh mejtie Saemiedigkie dongkeme. Daejtie maahtah daesnie lohkedh:
Mïsse Saemiedigkie raerieh sæjhta?
Saemiedigkie raerieh sæjhta barkoedåehkien dahkoesoejkesjen åvteste, dovne bijjemes prinsihpi åvteste guktie byöroe institusjonelle vuelien hïejme årrodh, men aaj magkeres sisvege byöroe vuelien hïejmesne årrodh jïh guktie dam öörnedh.
Guktie meatan årrodh govlehtimmesne?
Datne maahtah tjaaleldh govlehtimmie-vaestiedassem goeren tjïrrh seedtedh:
Årroeh meatan govlehtimmesne
Jis ih buektehth goerem nuhtjedh, datne maahtah vaestiedassem påastine seedtedh:
Saemiedigkie - Sametinget
Postboks 3
9735 Kárášjohka/Karasjok
Govlehtimmie-vaestiedassh leah byjjes jïh Saemiedigkien nedtesæjrojde bæjhkoehtuvvieh byjjeslaaken mietie.
Govlehtimmie-mierie: Goeven 15. biejjien 2026.