Vangesne histovrijem soptseste Lucie Mortensdatter Kanten bïjre. Vestre Slidresne tsïeglem jïh lïegkedimmiesijjiem Rensenn-jaevrien lïhke orrestahta. Daate lij saemien årromesijjie 1000 jaepiej juassah.
Saemiedigkieraerie Runar Myrnes Balto lea geerjene ihke dah saemien kultuvremojhtesh våajnoes jïh åehpies sjidtieh.
– Vihkele vuesiehtidh åarjelnöörjen histovrije aaj lea saemien histovrijen bïjre, Myrnes Balto jeahta.
Saemiedigkieraerie Elisabeth Erke (Gk), edtja rïhpestimmien meatan årrodh, lea joekoen aavone histovrije Lucien bïjre gåhtsajahta.
– Aalkoeåålmege nyjsenæjjahistovrije daamtaj åajaldahta, Erke jeahta.
Vang
Rïhpestimmie Vangesne lea skïereden 7. b. ts. 11.30, Mjøsvang kaféen lïhke. Desnie noelestimmie sjædta tsïeglijste, håalomh jïh musihke. Noelestimmien mænngan ålkone, programme Mjøsvang kaféesne jåarhka gusnie aaj gåassoehtimmie lunsjeste.
Soptsese Lucie Mortensdatter Kanten bïjre aalka gosse reakasovvi Rossenvaerine 1857. Desnie tsiehkieh lin geerve båatsoesaemide. Jeenjesh ålkoestamme sjïdtin sijjen båeries gåatomedajvijste. Jieniebinie tjïeltine luhpehts sjïdti bovtsem gåatoemisnie utnedh. Naakenh barkoem ryöjnesjæjjine veeltin nöörjen båatsoesiebrine. Akte dejstie lij Lars Jonasson Myrås. Lars jïh gåmmebe Lucie dan åvteste böötigan juhtien Vangese 1891, gusnie orrijin bijjene vaeresne Smådalesne. Lucie vaassjegeajnoem åadtjoeji. Dan bïjre sïjhth vielie govledh rïhpestimmesne.
Vestre Slidre
Rïhpestimmie Vestre Slidresne lea skïereden 8. b. ts. 11.00 Rensennjaevrien lïhke. Aaj daesnie edtja tsïeglem noelestidh, håalomh jïh musihke sjædta, jïh vuesiehtimmie kultuvremojhtesinie. Mænngan Brennabuse vuaja, gusnie lunsje, lohkehtimmie, musihke jïh håalomh.
Gööthsijjieh vuesiehtieh saemieh Rensennisnie årroejin vijkingetïjjen galhkovisnie. Arkeologeles kroehkemh vuesiehtieh dah sïrvenålloem butnin jïh viermine göölin. Aaj gieltege dajve lea ruevtieproduksjovneste mïerhkelgamme. Brennabusne åadtjoeh vielie saemiej bïjre govledh mah åarjemes vaerine årroejin.
Rïhpestimmie lea gaajhkesidie gaahpode, jih beapmoeh namhtah. Buerie båeteme!
Programme biejjide
Mer informasjon om lokaliteten i Vang
Mer informasjon om lokaliteten i Vestre Slidre