Sámedikki bargu lea oažžut ovttaárvosaš dearvvašvuođabálvalusaid sámi álbmogii ja main sámi giella ja kultuvra lea vuolggasadji. Duođaštuvvon máhttu sámi álbmoga dearvvašvuođa ja eallinlági birra, ja makkár áššit váikkuhit sámi álbmoga dearvvašvuođa dillái, fertejit leat vuođđun buori dearvvašvuođa ovdánahttimii sámi álbmogii. Máhttu lea dehálaš sihke dasa ahte identifiseret dearvvašvuođahástalusaid ja vai sáhttá doaimmaid bidjat johtui.