Gåetieh jïh tseegkeldahkh leah vihkeles gaaltije daajrose jïh histovrijasse saemien voenges siebriedahki bïjre. Daan biejjien mijjen lea daajroe ovrehte 900 vaarjeldihkie saemien gåetiej bïjre. Gåetieh saemien histovrijinie gaajhkine bieline Saepmeste gååvnesieh. Dah vuesiehtieh saemieh desnie hööllestamme jïh orreme, dovne joekoen «åehpies» saemien dajvine jïh daaroedehteme dajvine mah jïjnjem sijjen saemien ektiedimmeste dasseme. Saemiedigkie edtja hoksedh gåetieh aarvojne jïh vaarjelimmievyörtegs gåetieh jïh tseegkeldahkh gorresuvvieh areaalesoejkesjinie jïh råajvarimmine mejtie tjïelth soejkesjieh.