3 Krïevenasse soejkesjeprosessese jïh sjæjsjalimmievåaroemasse

Soejkesjimmesne jïh aktegsnænnoestimmine soejkesje- jïh bigkemelaaken mietie jïh mieriedimmesne konsekvensesalkehtimmiej bïjre:

a. Guktie råajvarimmie saemien kultuvren, jielemebarkoen jïh seabradahkejieleden eatnemevåaromem baajnehte edtja dan hijven salkehtimmiem jïh tjïelkestimmiem utnedh goh gåarede, jïh aerpievuekien jïh vitenskapeles daajroem våaroeminie utnedh Vuarjasjimmieh edtjieh tjaaleldh gååvnesidh reakta-aajhteridie, ïedtjeladtjide jïh sïejhme åålmegidie mej bïjre lea.

b. Edtja tjirkijigujmie saemien ïedtjeladtji åvteste rååresjidh. Edtja rååresjimmide gaajhki bïevnesigujmie sjyöhtehke tsiehkiej bïjre tjïrrehtidh aamhtesen gaajhkine daltesinie, jïh dejnie aajkojne sïemes sjïdtedh. Edtja rååresjimmieh tjïrrehtidh Saemiedigkine ajve dejnie aamhtesinie mejtie Saemiedigkie ij nyöjhkemenuepiem utnieh soejkesje- jïh bigkemelaaken mietie § 5-4.

c. Edtja doh tjåenghkies baajnehtimmieh dan sjyöhtehke åtnoedajven sisnjelen vuarjasjidh guktie joe dejtie tjïrrehtamme, nænnoestamme jallh jååhkesjamme soejkesjidie jallh råajvarimmide krööhkeste.

d. Desnie gusnie gåarede dam darjodh, edtja eaktoeh vuarjasjidh jïh vihtiestidh mah aajkojne utnieh hööptedh olles soejkesjh jïh råajvarimmieh negatijve konsekvensh saemien kultuvrese, jielemebarkose jïh seabradahkejieliedasse åadtjoeh. Daan nuelesne aaj vuarjasjidh mejtie lea nuepieh krïevenassh orrestimmien jïh restitusjovnen bïjre vihtiestidh, jïh areaalh jïh vierhtieh bååstede sertedh mænngan lea råajvarimmiem galhkeme.

e. Eatnemevåaromem krööhkestidh joekoen vihkele.

f. Akten tjåenghkies vuarjasjimmien mietie soejkesjimmie jïh aktegsnænnoestimmie eah edtjh maehtedh eatnemevåaromem nyöjhkedh, jallh hööptedh olles saemien kultuvre, jielemebarkoe jïh seabradahkejielede maehtieh sijjen åtnoedajvine jåerhkedh.

g. Edtja sjïehteladtedh guktie saamastallije guejmieh maehtieh saemien nuhtjedh dovne tjaaleldh jïh njaalmeldh.